Xefe Suku Mendonca Planeia Hamatak Maubise

Xefe Suku Maubise Villa, Nivio Lobato Mendonca. Foto Timor Post/Raimundos Oki

 MAUBISE – Xefe Suku eleitu Maubisse Villa, Nivio Lobato Mendonca konsiente katak matak no furak postu administrativu Maubisse nian oras ne’e tama hela iha kondisaun ameasadu nia laran, tanba komunidade sira komesa ladun proteze furak no matak ne’e rasik.

Nune’e, Xefe Suku Nivio promete katak ho nia mandatu ne’e sei halo esforsu atu oinsa bele hamatak no hafurak fali Maubisse nia imajen.

“Maubise ne’e konhesidu ho produsaun hortikultura no fatin turizmu, maibe kestaun rua ne’e ladun dezenvolve ho di’ak durante ne’e. Ha’u nia planu durante mandatu ne’e sei konsentra liu ba assuntu rua ne’e,” hatete Xefe Suku Nivio ba Jornalista sira iha restaurante SARA iha Maubisse villa, Sabadu 28 Janeiru 2017.

Problema bo’ot ne’ebe akontese iha Maubise villa mak kona – ba asesu ba be’e moos. Problema ne’e sadik tebes Xefe Suku foun ne’ebe ho idade joven, maibe enerjiatiku tebes no iha ambisaun bo’ot atu lori Maubise fila – fali ba nia orijin loloos.

“Ha’u halo ona diskusaun ho maluk balun kona – ba oinsa atu proteze tradisaun iha Maubisse nian, tanba realidade hatudu katak bainhira superior sira mai husi Vaticano atu vizita Igreja sira iha Timor, kultura Maubise mak sempre hamrik iha oin. Ida ne’e ami planeia atu aban no bain rua mak ami nia fatin turizmu sira di’ak, entaun bainhira turista ida mai vizita, tenke simu uluk ho kultura Maubise nian foin bele ba explora fatin turizmu sira ne’ebe iha,” promete Nivio.

Maubise nu’udar Postu Administrativu ida husi Munisipiu Ainaro, maibe geografikamente Maubisse Besik liu munisipiu Aileu no Manufahi kompara ho Ainaro. Ho distansia ne’ebe do’ok husi Ainaro, Xefe Suku ne’e sujere ba Banco Nacional Comercio Timor – Leste (BNCTL) tenke tau mos nia sukursal (cabang) ida iha Maubise hodi bele fasilita prosesu pagamentu ba funsionariu sira.

“Tanba husi ne’e atu ba Ainaro de’it mos transporte araska. Funsionariu hotu kada fulan nia rohan tenke abandona sira nia serbisu hodi ba simu de’it sira nia salariu iha Ainaro, depois afeta ba serbisu administrasaun publiku iha Maubise. Ida ne’e ladun di’ak. BNCTL persija estabelese nia cabang ida iha ne’e, tanba numeru funsionariu ne’e barak mak iha Maubise,” nia sujere.

Maubise rasik kompostu husi suku sia (9) ne’ebe nia lokalidade ne’e do’ok ba malu no do’ok tebes husi munisipiu Ainaro. Postu Administrativu ne’e kompostu husi Aldeia 69. Ninia total populasaun mos bo’ot tebes, maibe sentru atividade governu nian durante ne’e sentraliza hotu iha Ainaro.

“Husi suku hirak ne’e balun seidauk asesu ba be’e moos, eletrisidade no labarik barak mos seidauk hetan asesu ba edukasaun, tanba kauza husi distansia eskola ne’ebe do’ok,” esplika Nivio. (oki) 

A version of this article appears in print on February 1st, 2017, on page 1 7 of the Timor Post edition with the headline: Xefe Suku Mendonca Planeia Hamatak Maubise