Deskonfia Motorista Nakfilak ba Asesor IT, Kada Fulan Manan U$ 1000 Resin

DILI – Deskonfia motorista ida iha Gabinete Primeiru – Ministru (GPM) nian derepente nakfilak tiha ba serbisu asesor Information and Technology (IT) nian.

Tuir dokumentu kontratu serbisu ne’ebe Timor Post iha katak Claudio Cristovao Giri husi Bobonaro, moris iha loron 2/02/1985, fou – foun asina kontratu ho pozisaun motorista ho nia salariu kada fulan mak U$ 166,00. Kontratu primeiru ba pozisaun motorista ne’e asina husi Diresaun Nasional Rekursu Humanu GPM nian no Diresaun Jeral.

Data inisiu kontratu pozisaun kondutor ne’e hahu iha loron 15 Maio 2015 no foin remata iha loron 31 Jullu 2015.

“Ami sente no hare hakfodak tebes. Fou – foun nia mai iha ne’e tur bilang de’it iha odamatan oin ne’e, tanba nia mak lori xefe gabinete Primeiru – Ministru nia kareta, maibe derepente de’it ami hare ema ne’e sai fali asesor hodi mana osan bo’ot. Ema balun dehan ema ne’e xefe gabinete nia familia,” hatete fontes ida bainhira entrega dokumentu kontratu motorista ba Timor Post iha Palasiu Governu, Kuarta (13/01).

Fontes ne’e hatutan, staff IT sira uluk iha GPM ne’e konsidera Claudio Cristovao Giri laiha abilidade profisional kona – ba serbisu IT , maibe ho poder xefe gabinete, Lourdes DC Sanches nian derepente muda tiha nia ba kargu asesor hodi manan osan bo’ot.

“Ne’e krime nepotizmu no abuzu poder, tanba hatama familia ba serbisu, maibe laiha kapasidade ida. A’at liutan promove nian ba kargu asesor. Tanba ne’e mak ami husu ba Inspesaun Jeral Estadu (IJE) no Komisaun Anti – Korupsaun (KAK) tenke loke investigasaun ba kazu ne’e,” ezije fontes ne’e.  

Entretantu, kontratu serbisu ba kargu Oficial de Help Desk, ICT Gabinete Primeiru – Ministru (GPM) nian asina husi xefe gabinete, Lourdes DC Sanches iha loron 1 Setembru 2015 ho salariu U$ 1, 055.56 kada fulan.

Hatan kona – ba kestaun ne’e, xefe gabinete Primeiru – Ministru, Lourdes DC Sanches argumenta, promosaun ne’e akontese, tanba Cristovao Giri hatudu nia serbisu di’ak durante fulan ida nia laran no iha esperiensia di’ak kona – ba serbisu IT nian. Tanba ne’e mak maske foin serbisu fulan ida de’it nu’udar motorist, maibe derepente promove ba pozisaun asesor IT nian no manan salariu U$ 1, 055.56 kada fulan.

“Primeiru ami haruka ba media, maibe…hhhmmm..…bele koalia ho David Montalvao, ha’u mos lahatene ida,” hatete xefe gabinete, Lourdes DC Sanches via telefone ba Timor Post, Kuarta (13/01).

Xefe gabinete ne’ebe manan salariu U$ 6000 kada fulan ne’e hatutan, David Montalvao ba rekruta Cristovao Giri, tanba hare nia iha kapasidade ba area IT nian.

“Ha’u mos persija kondutor ida, maibe kuandu bolu ba fali IT nian, ha’u nain mak lori kareta,” esplika Lourdes DC Sanches.

Tuir lista salariu asesor GPM nian ba area ITC kompostu husi ema nain tolu (3). Andre Felix Marques assume kargu Chefe de Departamento do Servico de ITC ho nia salariu U$ 3,833.33, Claudio Cristovao Giri assume kargu Koordenador ICT ho salariu U$ 1, 055.56 no Ermelita M. dos Santos assume kargu ITC ho nia salariu U$ 1,277.78. (oki)  

Timor Post Print, 14th of January 2016