Pasaporte Arguidu Tiago Invalidu Ona Desde 2016

DILI —  Arguidu Tiagu Guerra ho nia fen Chang Fong Fong Guerra ka Tammy Guerra sira nia pasaporte tuan mate tiha ona desde fulan Jullu tinan 2016. Husi pasaporte rua ne’ebé mate iha tinan kotuk mak konfiskadu hela iha autoriedade judisiariu Timor – Leste nian.

Bazeia pasaporte tuan ne’ebé Timor Post asesu katak pasaporte tuan Tiago Guerra nian ho númeru L80567 no Tammy Guerra nian mak L805422. Maske pasaporte tuan ne’e mate tiha ona iha fullan Jullu 2016 no oras ne’e iha hela autoriedade judisiariu Timor – Leste nia liman, maibé ikus mai sira konsege hetan fali pasaporte foun ne’ebé deskonfia produz ka emite husi embaixada Portugal iha Timor – Leste. Kona – ba kestaun ne’e, Timor Post tenta ona halo konfirmasaun tantu ba direitamente ba edifisiu embaixada nian iha tasi ibun besik malu ho Palásiu Governu no Timor Post mós haruka lista pergunta balun via e-mail ofisial konsuladu no embaixada nian, maibé infelizmente to’o ohin loron seidauk hetan resposta ruma.

Tribunal Disitrital Dili hasai ona kondenasaun tinan 8 tama prijaun ba ida – idak, Tiago ho Tammy, tanba provadu komete krime pekulatu, maibe depois arguidu hirak ne’e halo rekursu ba Tribunal rekursu. Bainhira hato’o rekursu, Tribunal Rekursu hasai desijaun ida bolu proivizaun auzensia. Katak bandu tebes atu sira labele halai sai husi teritoriu nasional Timor – Leste nian. No desijaun ne’e mos Tribunal informa ba embaixada Portugal iha Timor – Leste katak labele produz dokumentu viajen ba arguidu nain rua, tanba desijaun primeira instansia nian iha ona. Desijaun ne’e mos hato’o ba parte serbisu imigrasaun katak bainhira hare no hetan ema nain rua ne’e atu halo viajen ba rai liur, tenke ka’er sira, maibé infelizmente iha loron 27 Outubru 2017, deskonfia embaixada Portugal iha Timor – Leste produz ka emite tan pasaporte foun ba arguidu nain rua ne’e. Pasaporte foun Tiago Guerra nian ho numeru C580008 no pasaporte arguida Tammy Guerra nian ho numeru C580007.

Liu tiha ida ne’e, arguidu sira sai husi Dili ba sa’e ró ki’ik ida iha portu Betano, Manufahi nian iha loron Kinta, 9 Novembru 2017 hodi halai tiha ba Darwin, Australia. To’o ne’eba, forsa fronteira Australia (Australian Border Force) nian konsege kaptura sira ho ró peska Indonezia nian, tanba konsidera sira tama ba teritoriu Australia nian ho illegal no mos pasaporte foun arguidu nain rua nian la tau karimbu ruma.      

Tuir informasaun seluk, ne’ebé Timor Post rekoella iha Betano, Manufahi katak deskonfia arguidu sira uja kareta Hilux mutin ida mak sai husi Dili ba portu Betano nian, tanba evidensia hatudu katak kareta Hilux mutin ne’e para ka estasiona kuaje semana ida resin ona, maibe to’o oras ne’e nain seidauk ba foti.

Segundu komandante polisia munisipiu Manufahi, Domingos Gregorio katak bazeia ba informasaun ne’ebe sira iha relata katak kareta ne’e nia nain mak malae mutin ida ho nia fen hanesan ema Xineza ida.

Nia hatutan, bazeia ba informasaun ne’ebe polisia Manufahi iha katak señora ida (deskonfia arguida Chang Fong Fong Guerra ka Tammy Guerra) no mala’e mutin mane ida (deskonfia arguidu Tiago Luis de Vilhena Texeira Guerra) mak uja kareta ne’e hodi ikus mai sa’e ró tama ba tasi laran to’o ohin loron seidauk sai mai hodi ba foti kareta ne’e. 

Nia hatutan, iha tempu ne’eba, iha kareta rua mak ba hamutuk iha fatin ne’e. Kareta ida mak ho marka Hilux Toyota koor mutin ho númeru matrikula mak A. 10 – 450 TL no kareta ida seluk mak dada power boat ka ró ki’ik ida. Liu tiha ida ne’e, kareta ida fila kedas ba Dili, maibé lembra ona kareta nia koor ho númeru matrikula.

“Tuir informasaun iha señora ida no señor ida mai uza ró jonson sai husi tasi ninin ne’e to’o iha tasi klaran, to’o horsehik ami nia polisia serbisu informasaun tun mai iha ne’e koleta informasaun ema nain rua ne’e seidauk fila mai. To’o ohin ha’u rasik to’o iha tasi ibun hare ho matan no husu ba peskador sira mós la seidauk hare malae nain rua ne’e sai mai husi tasi laran,” hatete segundu komandante polisia Domingos ba Jornalista sira iha Maha Kidan, Manufahi foin lalais.

Nia hatutan, tanba to’o oras ne’e kareta ne’e nia nain seidauk sai mai husi tasi klaran, nune’e nia fo hela avizu ba komunidade sira hodi tau matan ba kareta ne’e to’o nia nain mai mak bele foti.

Iha fatin hanesan, xefe suku Alas Maha Kidan, Cristovão Pereira Sanches katak kareta Toyota koor mutin ne’e bainhira para fatin ne’e laiha konsultasaun ho autoriedade lokal iha suku ne’e.

“Hanesan autoridade hafoin hetan informasaun no ami direitamente ba to’o kedas iha fatin kareta para ne’e. Ida ne’e to’o agora ami nafatin monitoriza hodi pasa informasaun ba iha seguransa no parte seguransa to’o kedas iha fatin ne’e no foti ona dadus,” hatete xefe suku Cristovão.

Nia hatutan, parte Serbisu Informasaun Polisia (SIP) munisipiu Manufahi nian mós foti ona informasaun kona – ba kareta ne’e. SIP ba halo intervista ho komunidade sira no peskador sira iha tasi ibun ne’e.

Nia dehan, fahe ona informasaun ba nia populasaun sira iha suku laran atu proteze kareta ne’e to’o nia nain sai fali mai husi tasi laran mak ba foti, maibé infelizmente kuaje semana ida ona, kareta nia nain seidauk sai hela de’it mai husi tasi laran. 

Iha kareta nia laran iha de’it masa aqua ki’ik ida ho folin 0,25 centavos nian no mina morin ida no iha kareta nia vidru oin iha sticker ida hakerek lia fuan Toyota 532. 

Atu justifika kareta ne’e nia nain, Timor Post tenta halo konfirmasaun ba Diresaun Nasional Transporte Terrestre (DNTT) iha Dili, maibé infelizmente rejeita atu fó informasaun.

“Ami labele ko’alia, tanba ida ne’e sai kazu ona. Depois ami hetan karta ida husi Tribunal mak ami bele fó sai informasaun kona – ba kareta nia nain,” hatete staff ida husi gabinete diretor DNTT nian.

Maske nune’e, Timor Post mós kontinua kontaktu ba diretor DNTT, Natalino do Rosário via telemovel, maibé la atende. 

Kona – ba situasaun ne’e mós komandante Unidade Polisia Maritima, Lino Saldanha hatete, to’o oras ne’e nia seidauk rona informasaun kona – ba kestaun ne’e.

Prosesu ba kazu ne’ebé involve arguidu Tiago Luis de Vilhena Texeira Guerra ho nia fen  arguida Chang Fong Fong Guerra alias Tammy Guerra rejistadu iha Prokurador Distrital Dili ho mak Númeru Unidade Crime (NUC 0511/14.PDDIL).

Tuir dokumentu ida ne’ebé Timor Post iha katak hafoin rona informasaun arguidu nain rua ne’e halai, Ministériu Públiku nu’udar nain ba asaun penal mós hasai kedas mandadu kapturasaun (Arrest Warrant) ho nia númeru referensia referensia GCCCC, 9 Novembru 2017.

Dokumentu ne’e esplika katak, iha loron Kinta, 9 Novembru 2017, ofisial Polisia Federal Australia, Chris Hansen ne’ebé oras ne’e serbisu ba Timor – Leste Police Development Program iha Timor – Leste informa ba Ministériu Públiku katak nia simu e – mail ida husi Polisia Imigrasaun Austrália iha Darwin, Northern Territory Australia katak arguidu Tiago Guerra ho Tammy Guerra oras ne’e iha hela Darwin no sei kontinua sira nia viajen ba Portugal.

“Nu’udar parte ida husi prosesu, sira nia pasaporte konfiskadu ona. No entantu, iha loron 27 Outubru 2017, embaixada Portugal iha Dili hasai (emiti) passaporte foun ba arguidu Tiago Guerra ho numeru C580008 no arguida Chang Fong Fong Guerra ho numeru C580007 hodi permite sira halai ba Darwin ho ró,” esplika dokumentu Ministériu Públiku nian ne’ebé Timor Post iha.

Dokumentu ne’e hatutan, tanba arguidu sira viola ne’ebé aplika ba sira atu labele viajen ba rai liur, tanba ne’e bazeia ba Kodigu Prosesu Penal Timor – Leste nian iha Artigu 181, 182, 183, 194 no 202 husu hasai surat mandadu kapturasaun (arrest warrant) ba sira.

Entretantu, Juiz administrador Tribunal Distrital Dili (TDD), Duarte Tilman Soares hatete, bazeia ba deklarasaun husi juiz sira ne’ebe hakotu lia kona – ba kazu ne’e katak arguidu nain rua (Tiago Guerra ho nia fen Chang Fong Fong) ne’e hetan ona kondenasaun iha primeira instansia iha Agostu 2017, maibé sira sei rekore (halo rekursu) ba Tribunal Rekursu. Desijaun primeira instansia kondena sira tinan 8 tama prijaun iha Agostu liuba, maibe depois sira halo rekursu ba Tribunal Rekursu.

Juiz Duarte hatutan, antes hetan kondenasaun, arguidu nain rua ne’e tama ona iha prijaun preventiva, maibé depois sira halo pedidu rekore ba Tribunal Rekursu no Tribunal Rekursu altera tiha medida koasaun ne’e tau ba iha proivizaun de auzensia (bandu atu labele sai husi teritoriu Timor – Leste) nian. Bandu sira atu labele sai husi teritoriu nasional ho konsekuensia mos prende sira nia pasaporte. Ne’ebe sira pasaporte husi nasaun orijin ne’ebe de’it.

“Ne’ebe sira pasaporte ne’e prende para bandu sira labele sai. Se sira iha pasaporte iha sira nia liman, desijaun mos la bandu sira,” hatete Juiz Duarte Tilman ba Timor Post iha Tribunal Dili, Segunda (13/11).

“To’o agora hatene informasaun katak sira sai tiha ho ró peskas nian. Lahatene sai husi ida ne’ebé,” esplika juiz Duarte.

Iha audiénsia julgamentu ne’e Prezide husi juis Koletivu Jacinta Correia, Ana Paula Fonseca, Eusébio Víctor, Ministériu Públiku reprezenta husi Prokuradora Angelina Saldanha, Jacinto Babo, arguidu sira hetan asisténsia legál husi advogadu Privadu José Teixeira no Maurício Soares.

To’o oras ne’e arguidu nain rua ne’e sei iha hela Darwin, Austrália. Timor Post seidauk hetan informasaun klean kona – ba bainhira mak arguidu nain rua fila mai Timor – Leste hodi submete ba justisa ne’ebé iha.

Arguidu Tiago Luis de Vilhena Texeira Guerra nu’udar oan husi Carlos Eduardo Texeira Guerra no Maria Dias Vilhena Texeira Guerra moris iha Portugal iha loron 8 Outubru 1971. Nia kaben nain no sidadaun Portugal, no mós funsionáriu Banku Mundial ne’ebé hela iha Pantai Kelapa besik embaixada Estadus Unidus Amerika nian no arguida Chang Fong Fong Guerra alais Tammy, nu’udar oan feto husi Chang Iam Seng no Tam Sio Peng Mae, moris iha Xina iha loron 4 Setembru 1977. (oki)

Notisia versaun ne'e públika iha Jornal Timor Post edisaun Kinta, 16 Novembru 2017 iha pájina primeiru ho titlu: Portugueza Rua Halai nia Pasaporte Invalidu iha 2016. 

A version of this article appears in print on Thursday, 16th November 2017, on page 1 of the Timor Post edition with the headline: Defendant Tiago Guerra's passport has been invalid since 2016.