Deskonfia Arguidu Tiago Abandona Hela Kareta Iha Maha Kidan

Foto TP/Luis Casmeiro Lopes

Deskonfia arguidu Tiago Guerra ho nia fen Chang Fong Fong Guerra ka Tammy Guerra mak lori kareta Hilux Toyota Mutin ho númeru matrikula A. 10 – 450 TL sai husi Dili ba so’e hela iha tasi ibun Maha Kidan besik portu Betano, Manufahi.

MAHA KIDAN — Kareta mutin ho numeru matrikula A. 10 – 450 TL para iha area tasi ibun besik portu Betano, Manufahi kuaje samana ida ona. Deskonfia arguidu Arguidu Tiago Luis de Vilhena Texeira Guerra ho nia fen Chang Fong Fong Guerra ka Tammy Guerra mak uja hodi ba sa’e ró iha portu Betano. 

Komunidade sira iha suku Alas Maha Kidan, munisipiu Manufahi durante semana ida ona hein hela kareta ne’e nia nain hodi ba foti, maibé infelizmente to’o oras ne’e seidauk ba foti.

Segundu komandante polisia munisipiu Manufahi, Domingos Gregorio katak bazeia ba informasaun ne’ebe sira iha relata katak kareta ne’e nia nain mak malae mutin ida ho nia fen hanesan ema Xineza ida.

Nia hatutan, bazeia ba informasaun ne’ebe polisia Manufahi iha katak señora ida (deskonfia arguida Chang Fong Fong Guerra ka Tammy Guerra) no mala’e mutin mane ida (deskonfia arguidu Tiago Luis de Vilhena Texeira Guerra) mak uja kareta ne’e hodi ikus mai sa’e ró tama ba tasi laran to’o ohin loron seidauk sai mai hodi ba foti kareta ne’e.  

Nia hatutan, iha tempu ne’eba, iha kareta rua mak ba hamutuk iha fatin ne’e. Kareta ida mak ho marka Hilux Toyota koor mutin ho númeru matrikula mak A. 10 – 450 TL no kareta ida seluk mak dada power boat ka ró ki’ik ida. Liu tiha ida ne’e, kareta ida fila kedas ba Dili, maibé lembra ona kareta nia koor ho númeru matrikula.

“Tuir informasaun iha señora ida no señor ida mai uza ró jonson sai husi tasi ninin ne’e to’o iha tasi klaran, to’o horsehik ami nia polisia serbisu informasaun tun mai iha ne’e koleta informasaun ema nain rua ne’e seidauk fila mai. To’o ohin ha’u rasik to’o iha tasi ibun hare ho matan no husu ba peskador sira mós la seidauk hare malae nain rua ne’e sai mai husi tasi laran,” hatete segundu komandante polisia Domingos ba Jornalista sira iha Maha Kidan, Manufahi foin lalais.

Nia hatutan, tanba to’o oras ne’e kareta ne’e nia nain seidauk sai mai husi tasi klaran, nune’e nia fo hela avizu ba komunidade sira hodi tau matan ba kareta ne’e to’o nia nain mai mak bele foti.

Iha fatin hanesan, xefe suku Alas Maha Kidan, Cristovão Pereira Sanches katak kareta Toyota koor mutin ne’e bainhira para fatin ne’e laiha konsultasaun ho autoriedade lokal iha suku ne’e.

“Hanesan autoridade hafoin hetan informasaun no ami direitamente ba to’o kedas iha fatin kareta para ne’e. Ida ne’e to’o agora ami nafatin monitoriza hodi pasa informasaun ba iha seguransa no parte seguransa to’o kedas iha fatin ne’e no foti ona dadus,” hatete xefe suku Cristovão.

Nia hatutan, parte Serbisu Informasaun Polisia (SIP) munisipiu Manufahi nian mós foti ona informasaun kona – ba kareta ne’e. SIP ba halo intervista ho komunidade sira no peskador sira iha tasi ibun ne’e.

Nia dehan, fahe ona informasaun ba nia populasaun sira iha suku laran atu proteze kareta ne’e to’o nia nain sai fali mai husi tasi laran mak ba foti, maibé infelizmente kuaje semana ida ona, kareta nia nain seidauk sai hela de’it mai husi tasi laran.  

Iha kareta nia laran iha de’it masa aqua ki’ik ida ho folin 0,25 centavos nian no mina morin ida no iha kareta nia vidru oin iha sticker ida hakerek lia fuan Toyota 532. 

Atu justifika kareta ne’e nia nain, Timor Post tenta halo konfirmasaun ba Diresaun Nasional Transporte Terrestre (DNTT) iha Dili, maibé infelizmente rejeita atu fó informasaun.

“Ami labele ko’alia, tanba ida ne’e sai kazu ona. Depois ami hetan karta ida husi Tribunal mak ami bele fó sai informasaun kona – ba kareta nia nain,” hatete staff ida husi gabinete diretor DNTT nian.

Maske nune’e, Timor Post mós kontinua kontaktu ba diretor DNTT, Natalino do Rosário via telemovel, maibé la atende. 

Kona – ba situasaun ne’e mós komandante Unidade Polisia Maritima, Lino Saldanha hatete, to’o oras ne’e nia seidauk rona informasaun kona – ba kestaun ne’e.

Deskonfia embaixada Portugal iha Timor – Leste mak fasilita arguidu Tiago Luis de Vilhena ho nia fen arguida Chang Fong Fong Guerra ka Tammy Guerra halai ba Darwin Austrália, tanba sira nia passaporte orijinal konfiskadu hela iha Tribunal Timor nian, maibé dokumentu ofisial ida husi Ministériu Públiku alega embaixada Portugal mak hasai ka emita tan pasaporte foun ba kasal nain rua ne’e iha loron 27 Outubru 2017.

Tuir informasaun ne’ebe Timor Post iha katak arguidu nain rua ne’e halai husi Dili  no ba sa’e ró ki’ik ida iha suku Betano, munisipiu Manufahi no bainhira to’o iha Darwin, Australia, polisia Australia ka’er kedas sira, tanba tama ba teritoriu Australia ho illegalmente. Entretantu, reportazen husi ajensia notisia Northern Territory News (NT News) katak forsa fronteira Australia nian halo ona detensaun ba sidadaun Portugal nain rua, tanba sira tama ba teritoriu Australia nian ho illegalmente.

Ema hirak ne’e to’o iha Darwin iha loron Kinta, 9 Novembru 2017 iha Darwin Sailing Club. 

Prosesu ba kazu brankeamentu kapitais ne’ebé involve Tiago Luis de Vilhena Texeira Guerra ho nia fen Chang Fong Fong Guerra alias Tammy Guerra rejistadu iha Prokurador Distrital Dili ho mak Númeru Unidade Crime (NUC 0511/14.PDDIL).

Tuir dokumentu ida ne’ebé Timor Post iha katak hafoin rona informasaun arguidu nain rua ne’e halai, Ministériu Públiku nu’udar nain ba asaun penal mós hasai kedas mandadu kapturasaun (Arrest Warrant) ho nia númeru referensia referensia GCCCC, 9 Novembru 2017.

Dokumentu ne’e esplika katak, iha loron Kinta, 9 Novembru 2017, ofisial Polisia Federal Australia, Chris Hansen ne’ebé oras ne’e serbisu ba Timor – Leste Police Development Program iha Timor – Leste informa ba Ministériu Públiku katak nia simu e – mail ida husi Polisia Imigrasaun Austrália iha Darwin, Northern Territory Australia katak arguidu Tiago Guerra ho Tammy Guerra oras ne’e iha hela Darwin no sei kontinua sira nia viajen ba Portugal.

“Nu’udar parte ida husi prosesu, sira nia pasaporte konfiskadu ona. No entantu, iha loron 27 Outubru 2017, embaixada Portugal iha Dili hasai (emiti) passaporte foun ba arguidu Tiago Guerra ho numeru C580008 no arguida Chang Fong Fong Guerra ho numeru C580007 hodi permite sira halai ba Darwin ho ró,” esplika dokumentu Ministériu Públiku nian ne’ebé Timor Post iha.

Dokumentu ne’e hatutan, tanba arguidu sira viola ne’ebé aplika ba sira atu labele viajen ba rai liur, tanba ne’e bazeia ba Kodigu Prosesu Penal Timor – Leste nian iha Artigu 181, 182, 183, 194 no 202 husu hasai surat mandadu kapturasaun (arrest warrant) ba sira.

Timor Post tenta halo konfirmasaun ba konsuladu ka enkaregadu negósiu Portugal nian iha Timor – Leste, maibé la atende. Timor Post mós hakat kedas ba edfisiu embaixada Portugal iha tasi ibun besik malu ho Palásiu Governu nian, maibé nafatin la atende. 

Entretantu, Juiz administrador Tribunal Distrital Dili (TDD), Duarte Tilman Soares hatete, bazeia ba deklarasaun husi juiz sira ne’ebe hakotu lia kona – ba kazu ne’e katak arguidu nain rua (Tiago Guerra ho nia fen Chang Fong Fong) ne’e hetan ona kondenasaun iha primeira instansia iha Agostu 2017, maibé sira sei rekore (halo rekursu) ba Tribunal Rekursu. Desijaun primeira instansia kondena sira tinan 8 tama prijaun iha Agostu liuba, maibe depois sira halo rekursu ba Tribunal Rekursu.

Juiz Duarte hatutan, antes hetan kondenasaun, arguidu nain rua ne’e tama ona iha prijaun preventiva, maibé depois sira halo pedidu rekore ba Tribunal Rekursu no Tribunal Rekursu altera tiha medida koasaun ne’e tau ba iha proivizaun de auzensia (bandu atu labele sai husi teritoriu Timor – Leste) nian. Bandu sira atu labele sai husi teritoriu nasional ho konsekuensia mos prende sira nia pasaporte. Ne’ebe sira pasaporte husi nasaun orijin ne’ebe de’it.

“Ne’ebe sira pasaporte ne’e prende para bandu sira labele sai. Se sira iha pasaporte iha sira nia liman, desijaun mos la bandu sira,” hatete Juiz Duarte Tilman ba Timor Post iha Tribunal Dili, Segunda (13/11).

“To’o agora hatene informasaun katak sira sai tiha ho ró peskas nian. Lahatene sai husi ida ne’ebé,” esplika juiz Duarte.

Desizaun koletivu TDD hatún pena tinan ualu (8) ba ida - idak tama prizaun tinan 8, inklui selu indenizasaun ba Estadu ho valór $859.000.

Akuzasaun husi Ministériu Públiku, iha tinan 2010, Governu Reinu Noruega, liu husi mekanizmu kooperasaun bilaterál internasionál, presta asisténsia téknika no finanseira liu husi Governu iha kontratasaun profisionál ba arguidu Bobby Boye hodi ezerse nia funsaun nu’udar asesór internasionál iha Ministériu Finansas, espesifikamente iha área impostu petrolíferu ba períodu tinan ida ne’ebé remata, iha Juñu 2011.

Maibé, tanba Ministériu Finansas sei nafatin presiza apoiu ne’e iha rekuperasaun no likidasaun ba impostu petrolíferu, Diresaun Impostu deside halo kontratu foun ba arguidu Bobby Boye.

ArguiduTiago Guerra ho Tammy Guerra nu’udar kaben-na’in no mai iha Timor iha tinan 2010 no hela besik ho arguidu Bobby Boye. Maibé, iha tinan 2011, arguidu Bobby Boye ho Tammy Guerra komesa iha relasaun di'ak.

Iha tinan hanesan, arguidu Tiago Guerra hari kompañia Olive Unipessoal Lda, iha Timor Leste ho atividade prinsipál mak prestasaun servisu asesoria ba negósiu, partikularmente iha área impostu.

Arguidu Bobby Boye iha mós funsaun atu halo akordu iha termu kontratu, kompeténsia no autoridade atu kondús negosiasaun ho kompañia petrolífera ne’ebé jere tasi Timor ba kobransa impostu. Hanesan forma ne’ebé planeia ona, iha tinan hanesan arguida Tammy Guerra ba loke kompañia iha Makau hamutuk ho atividade prinsipál hanesan mak fó prestasaun servisu ba asesoria no konsultoria iha negósiu. Kompañia ne’e ho naran Olive Consultancy Company Limited iha Makau.

Kazu ne’e hahú mosu bainhira arguidu Bobby Boye komesa trasa ona planu negosiasaun hodi obriga empreza Noruega DOF Subsea - Norway atu selu ona debe impostu (impostu ne’ebé seidauk selu ba tempu naruk).

Atu negosiasaun sai efeitu liu, arguidu Bobby Boye kontrata empreza advogadu SIMONSEN Advocate Firm DA, iha Noruega, reprezenta autoridade fiskál iha Timor-Leste hodi negoseia ho DOF Subsea- Norway ba pagamentu debe ba estadu Timor-Leste.

Bazeia ba rezultadu negosiasaun ne’e, iha Novembru 2011, empreza Noruega DOF Subsea - Norwey konkorda sei selu dívida ba iha Estadu Timor-Leste ho montante US$ 1.009.332.

Iha loron 2 Dezembru 2011, empreza Noruega DOF Subsea - Norway hahú halo pagamentu liu husi konta autoridade bankária pagamentu Timor Leste, ba konta fundu petrolífera nian ne'ebé hamutuk iha rezerva Federal Estadu Unidus Amérika ho kuantia US$ 145.441.

Maibé iha loron hanesan empreza Noruega DOF Subsea - Norway halo mós transferénsia ba iha konta bankária SIMONSEN Advocate Firm DA ho kuantia US$ 4.172.

Iha loron tuir mai, arguidu Bobby Boye husu ba SIMONSEN Advocate Firm DA atu transfere osan hirak ne’e ba iha kompañia Olive Consultancy Company Limited ne’ebé pertense ba Tammy Guerra iha Makau liu husi Banku BNU iha Makau.

Hafoin ida ne’e iha loron tuir mai arguidu Bobby Boye mós husu ba empreza Noruega DOF Subsea - Norway atu transfere US$ 859.706 ba iha konta bankária empreza advogadu SIMONSEN Advocate Firm DA.

Iha loron 5 Dezembru 2011, Bobby Boye liu husi diresaun email haruka reprezentativu empreza advogadu SIMONSEN Advocate Firm DA, Frode A. Bernstein atu transfere osan ho kuantia US$ 859.706, ba iha kompañia Olive Consultancy Company Limited ne’ebé pertense ba Tammy Guerra iha Macau.

Iha 16 Dezembru 2011, arguida Tammy Guerra tranfere osan ho valor US$ 859.706 ba iha arguidu Bobby Boye liu husi konta bankária Firma Advogadus Teschon, Roccobone & Siss iha Midland Park, New-Jersey, Estadu Unidu da Amérika. Arguidu Bobby Boye utiliza osan ne’e hodi sosa kedan uma iha Estadu Unidu Amérika.

Tanba ne’e, Ministériu Públiku akuza arguidu Tiago Guerra no Tammy Guerra ho krime tolu, artigu 295 kona-ba krime pekulatu, artigu 303 kona-ba krime falsifikasaun dokumentu no artigu 313 (a), (b) no (c) kona-ba krime brankeamentu kapitál husi Kódigu Penál.

Testemuña Mónica Rangel nu’udar Diretora Impostu konfirma ba faktu hotu kona-ba valór dívida no osan ne’ebé lakon. Maibé deklara katak, nia ladún iha koñesimentu oinsá arguidu sira bele na’ok, tanba arguidu Bobby Boye halo negosiasaun barak liu husi email ne’ebé la fó koñesimentu ba nia.

Alegasaun finál Ministériu Públiku husu ba arguidu sira atu fó fila-fila osan ne’ebé arguidu sira halakon ne’e.

Maibé, parte defeza husi arguidu sira nian la simu desizaun husi Tribunál Distritál Dili (TDD) tanba faktu husi Ministériu Públiku (MP) ne’ebé Tribunál lee sai faktu sira ne’e la justu, tanba ne’e defeza hakarak atu halo rekursu ho nia prazu durante loron 15 nia laran.

Iha audiénsia julgamentu ne’e Prezide husi juis Koletivu Jacinta Correia, Ana Paula Fonseca, Eusébio Víctor, Ministériu Públiku reprezenta husi Prokuradora Angelina Saldanha, Jacinto Babo, arguidu sira hetan asisténsia legál husi advogadu Privadu José Teixeira no Maurício Soares.

To’o oras ne’e arguidu nain rua ne’e sei iha hela Darwin, Austrália. Timor Post seidauk hetan informasaun klean kona – ba bainhira mak arguidu nain rua fila mai Timor – Leste hodi submete ba justisa ne’ebé iha.

Arguidu Tiago Luis de Vilhena Texeira Guerra nu’udar oan husi Carlos Eduardo Texeira Guerra no Maria Dias Vilhena Texeira Guerra moris iha Portugal iha loron 8 Outubru 1971. Nia kaben nain no sidadaun Portugal, no mós funsionáriu Banku Mundial ne’ebé hela iha Pantai Kelapa besik embaixada Estadus Unidus Amerika nian no arguida Chang Fong Fong Guerra alais Tammy, nu’udar oan feto husi Chang Iam Seng no Tam Sio Peng Mae, moris iha Xina iha loron 4 Setembru 1977. (oki/mj1/oro/res) 

Notisia versaun ne'e públika iha Jornal Timor Post edisaun Kuarta, 15 Novembru 2017 iha pájina primeiru ho titlu: Deskonfia Arguidu Tiago Abandona Hela Kareta Iha Maha Kidan.   

A version of this article appears in print on Tuesday, 14th November 2017, on page 1 of the Timor Post edition with the headline: Allegedly defendant Tiago Guerra abandoned their Car iha Maha Kidan.