Adelaide: “Ha’u Persija O nia Prezensa, La’os Lalatak”

Iha knua ida iha mane klosan ida no feto ran ida mak João ho Adelaide. Sira nain rua namora malu. La kleur, João ne’e hetan serbisu iha fatin do’ok. Iha tempu ne’eba, seidauk iha internet hodi bele komunika sira nia domin ba malu. Buat hotu paradu itoan hodi halo João hanoin barak atu halo oinsa mak sira nia domin ne’e bele la’o nafatin. João komesa buka dalan atu bele komunika nafatin ho nia doben Adelaide. Nia ativu hakerek surat ba Adelaide.

Iha surat primeiru, Adelaide konsege fó resposta hodi halo João sente kontente tebes no ativu tebes kontinua hakerek. Lakleur de’it, Adelaide la fó resposta ona ba João nia surat. Durante tinan ida resin, Adelaide ne’e nunka fó resposta. Koitadu tebes no triste tebes ba Jõaa ne’ebé sempre badinas hakerek surat.

Situasaun ne’e halo Jãoa sente konfujaun tebes no husu ba nia katak, saida mak akontese? Atu justifika no klarifika situasaun ne’e, nia desidi hodi ba vizita nia doben, Adelaide. To’o ne’eba, João hare labarik ki’ik ida mak halimar iha uma oin. João husu ba nia laran, Adelaide dalaruma kaben ona ho mane seluk no sira nia oan mak halimar iha uma oin ne’eba. Laran kontinua konfujaun no la fi’ar nafatin. João hakbesik liutan ba uma oin.

Derepente Adelaide halai sai mai husi uma laran hodi hasoru nia. Akontese ona konversasaun entre sira nain rua. João husu ba Adelaide tanba saida mak la resposta surat ne’ebé nia haruka. Adelaide lia tun ba João hodi dehan; “Ha’u simu duni ita nia surat sira ne’e, maibé lia fuan mamuk ne’ebé hakerek iha surat tahan ne’e seidauk sufisiente ba ha’u. Ha’u persija liu o nia prezensa. La’os lia fuan mamuk iha surat tahan de’it,” hatete Adelaide ho mata been ba João.

Adelaide konsidera João nia domin ne’ebé pinta iha surat tahan mutin ne’e hanesan buat la’ek ida. Domin iha surat tahan mutin nia leten hanesan buat mamuk ida ba Adelaide. Adelaide prefere domin ida ho nia prezensa. Domin ida ho nia isin lolon tomak, la’os domin ho nia lalatak de’it iha surat tahan mutin hanesan João halo dadauk ne’e.

Tanba kaer metin ba prinsipiu domin ho prezensa isin lolon tomak mak, Adelaide desidi hodi kaben de’it ho mane ida ne’ebé lor-loron lori (antar) surat ba nia. “Ha’u kaben ho ida lor-loron lori surat mai ha’u, tanba nia mak lor-loron mai vizita ha’u. Loos duni ita bo’ot hakerek surat, maibé ha’u persija o nia prezensa. La’os o nia surat tahan mutin” hatete Adelaide.

Tanba ne’e, domin ho lia fuan de’it seidauk sufisiente, maibé domin tenke hatudu liuhosi ita nia prezensa no aktu sira.