Deskonfia Mosu “Iregularidade” Pagamentu ba Hotel Ambeno

DILI – Bazeia ba dokumentu kontratu amendment NO. 1 entre gabinete Zona Espesiál ba Ekonómia Sosiál no Merkadu (ZEESM) ho empreza Timor Capital Partners Asia, Lda ho númeru referensia GAB – RAEOA EZEESM – TL 006 – C – 2015 kona – ba konstrusaun hotel iha Pante Makasar Oe – Kusi Ambeno, deskonfia iha indikasaun forte ba krime partisipasaun ekonómia iha negósiu, abuzu poder no mal – administrasaun, tanba prosesu pagamentu ba projetu ne’e la tuir kontratu ne’ebé hatudu iha particular conditions of contract iha sub – clause 14 – 7 payment.

Particular conditions of contract sub – clause 14 – 7 esplika the first payment to the contract shall be made by the employer when the progress of the works has reached 50%. As certified by the engineer. (pagamentu primeiru ba kontratu tenke halo husi empregador bainhira progresu projetu ne’e atinze ona 50%), maibé bazeia ba pedidu pagamentu husi empreza Timor Capital Partners Asia, Lda iha loron 16 Outubru 2015 husu ona pagamentu ho montante  US$860,739.04 maske progressu husi projetu ne’e foin mak to’o 30%. Montante osan hirak ne’e transfere ba empreza nia konta bankaria 3010xxxx iha loron 16 Outubru 2015.

Bainhira konfirma kestaun ne’e ba Sekretaria Rejionál Finansa, Leonia da Costa Monteiro katak nia ladun apar didi’ak ho prosesu pagamentu ne’e.

“Ha’u ladun apar didi’ak ida … ha’u ladun apar didi’ak ida. Tanba ha’u ladun apar didi’ak, ha’u tenke hare dokumentu lai mak ha’u ko’alia,” hatete Leonio da Costa Monteiro via kontaktu telemovel ba Timor Post, Domingo, (09/07).

Entretantu, pedidu empreza ba pagamentu iha loron 16 Outubru 2015 no iha loron ne’e kedas, gabinete RAEOA & ZEEMS – TL liu husi dokumentu Autorizasaun Debitu no Kreditu Bankaria mós halo kedas prosesu pagamentu sein asina tura husi prezidente autoriedade Oe – Kusi Ambeno, Mari Alkatiri, tanba iha tempu ne’eba nia iha Repúblika Popular China hela, maibé nia Sekretaria Rejionál ba assuntu Finansa, Leonia da Costa Monteiro justifika katak iha ona konkordansia via kontaktu telemovel ho Prezidente Autoridade Oe – Kusi Ambeno Mari Bim Amude Alkatiri.

“Iha konkordansia liu husi via komunikasaun kontacto telefone, entre Presidente Autoriedade Dr. Mari Alkatiri no Director BNU hodi Bele halo Prosesu transferencia urgente ba pagamento OP – 00303 ba Empreza Timor Capital Partners Asia, LDA, wainhira Senhor Dr. Mari Alkatiri fila husi China iha dia 22 de Outubro 2015 mak halo assina fali Documento Autorizasaun Pagamento,” hatete Leonia da Costa Monteiro liu husi nia karta autorizasaun debitu no kreditu bankaria iha loron 16 Outubru 2015 ne’ebé Timor Post asesu foin lalais.  

Konteudu husi dokumentu ne’e hakerek, pessoal responsavel ne’ebé halo levantamentu fundu (osan) mak Diretora Rejionál Finansas, Eliza Maria Maniquin ho nia númeru kartaun eleitorál mak 542312 no ofisial ne’ebe sertifika mak Sekretaria Rejionál Finansas, Leonia da Costa Monteiro no ofisial ne’ebe autoriza mak Mari Bim Amude Alkatiri via kontaktu telemovel de’it no sein (tanpa) asinatura.

“Aktu ne’e hatudu momoos Leonia da Costa Monteiro halo krime, abuzu poder, krime mal – administrasaun no krime partisipasaun ekonómia iha negósiu, tanba lei aprovizionamentu Oe – Kusi Ambeno nian iha artigu 2 versiku 3 katak Mari Alkatiri mak iha kompetensia asina kontratu no hafoin  adjudikasaun. Entaun, labele ko’alia de’it liu husi telefone,” esplika jurista ida ne’ebé husu ba Timor Post atu labele públika nia identidade kompletu iha notisia ne’e.  

“Lei ne’e esplika klaru katak tenke asina lai mak halo pagamentu no a’at liutan akordu dehan projetu tenke to’o lai 50% mak selu, maibé projetu seidauk to’o arkodu ne’e, sira selu ona. Entaun, ida ne’e korupsaun bo’ot no violasaun bo’ot kontra lei aprovizionamentu Oe – Kusi Ambeno nian,” esplika jurista ne’e.   

“Depois pior liutan, pagamentu ne’e Prezidente RAEOA no ZEESM – TL la asina, maibé ho razaun telefone de’it no haruka selu. Bainhira Mari Alkatiri mai husi liur mak asina pagamentu, maibé osan selu uluk tiha ona,” esplika jurista ho laran triste.   

Nune’e mós diretor Asia Justice and Rights (AJAR), José Luis Oliveira katak se de faktu akontese nune’e duni, mak ne’e violasaun ba klauza kontratual ne’ebé iha indikasaun abuzu poder hodi benefisia empreza ne’e, no ne’e kazu korupsaun ida tuir Artigu 297 Kadigu Penal.

“Lamentavel tebes ba kazu korupsaun ne'e nomos kazu seluk ne'ebé akontese iha RAEO, tanba afinal governasaun RAEO laiha diferensia ho AMP ka Bloco Parlamentar ne’ebé komete korupsaun no mal – administrasaun hanesan de’it,” hatete José Luis Oliveira via chatting Facebook ba Timor Post iha Dili, Sábadu (08/07).

Kona – ba kestaun ne’e, Prezidente Autoriedade Rejiaun Espesial ba Administrativu Oe - Kusi Ambeno (RAEOA) no Zona Ekonomia Sosial no Merkadu (ZEESM), Mari Alkatiri hatete, nia ladun fiar kona – ba dokumentu sira ne’ebé Timor Post asesu.

“Diak liu buka informasaun lolos. Labele inventa,” hatete Alkatiri via chatting WhatsApp ba Timor Post, Domingo (09/07).

“Ha’u la fiar. Bele publika docomento,” Alkatiri hatete. (oki)

A version of this article appears in print on July 10th, 2017, on page 1 of the Timor Post edition with the headline: Deskonfia, Alkatiri Iha Xina Mosu Iregularidade ba Pagamentu Projetu ZEESM. 

Notisia Timor Post edisaun Segunda, 10 Jullu 2017 iha pajina primeiru ho titlu Deskonfia, Alkatiri Iha Xina Mosu Iregularidade ba Pagamentu Projetu ZEESM.