Ohin Tribunal Dili Julga Kazu Osan Lakon Iha SEPFOPE

DILI – Bazeia ba ajenda Tribunal Dili nian ne’ebé Timor Post hetan asesu katak ohin horas tuku 4 lorokraik, Tribunal Dili sei rona deklarasaun husi Mateus Abi nu’udar testamuña ba kazu osan hamutuk US $ 5,221.00 ne’ebé lakon iha Sekretariu Estadu Polítika ba Formasaun Profisionál no Empregu (SEPFOPE) iha tinan 2013.   

Iha loron Segunda, 9 Dezembru 2013, Timor Post mak públika uluk notísia ne’e iha pajina primeiru edisaun Timor Post Tersa, 10 Dezembru 2013 kona – ba osan ne’ebé lakon iha SEPFOPE.

Antes ne’e, Mateus Abi nudar to’os nain esplika katak, iha Kuarta 23 Novembru 2013 hetan kontaktu husi SEPFOPE sentral hodi husu klarifikasaun kona ba osan hamutuk rihun lima resin ne’ebe lakon iha SEPFOPE Dili.

“Hau hakfodak kuandu sira temi dehan osan lakon. Sira husu hau katak, ita bo’ot nia eleitoral mak ne’e, hau dehan sim. Depois sira husu tan iha loron 29 Outubru 2013 ita bo’ot ba Dili. Hau dehan, Dili ne’e desde tinan 1999 to’o ohin loron hau seidauk ba. Hafoin ida ne’e liu tiha mak sira foin hateten hau dehan ema balun foti osan uja hau nia eleitoral,” hateten Mateus Abi ba Timor Post foin lalais.

“Sira dehan ami mai husu ita bo’ot tanba iha loron 29 Outubru 2013, osan hamutuk rihun lima resin, lakon iha SEPFOPE. Hau hatan ba sira katak, SEPFOPE Oekusi deit hau lahetan, saida tan SEPFOPE Dili? Loos duni, hau sempre ba basar (merkadu), maibe hau nunka ba SEPFOPE, Oekusi,” hateten Abi.

Abi mós rekoñese katak, iha tinan 2012, sira nia grupu ho naran Binoni ho membrus hamutuk nain 20 resin hatama sira nia kartaun eleitoral ba SEPFOPE Oekusi hodi husu apoiu humanitariu. Grupu ne’ebe bazeadu iha Aldeia Saben, Suku Bobometo, Sub-distritu Oesilo, distritu Oekusi.

“Ha’u le’e no hakerek lahatene. Kuandu atu halo buat ruma, ha’u halo asina liu husi hanesan liman deit. Hau nia liman to’os wainhira kaer lapizeira, oinsa mak hau bele asina? Tanba ne’e hau sente preokupa tebes ba hau nia dignidade tanba agora ema hotu hatene katak, hau mak naok osan, maibe hau lahatene buat ida,” nia hateten.

Tuir resivu banku Mandiri nian ne’ebe diariu Timor Post asesu katak, diretor SEPFOPE Oekusi, Mario Muni foti osan uja Mateus Abi nia kartaun eleitoral ho númeru 0444055 iha loron 29 Outubru 2013. Osan ne’ebe foti hamutuk dolar Amerikanu US $ 5,221.00 ne’ebe uja konta bankaria Mandiri ho nia nain mak Mario Muni nian ho númeru 601 00-00-5597-76. 

Hafoin ida ne’e, SEPFOPE sentral ba kedas Mateus Abi nia hela fatin iha Aldeia Saben, Suku Bobometo, Sub-distritu Oesilo, distritu Oekusi hodi husu klarifikasaun. Wainhira to’o ne’eba, halo Mateus Abi hakfodak tebes tanba nia nunka fo nia kartaun eleitoral ba Mario Muni hofi foti osan nomos Mateus nudar ema to’os nain ne’ebe lahatene le’e no hakerek.

“Ha’u ema analfabetu, oinsa mak hau bele hatene priense resivu banku nian nomos oinsa mak hau bele hatene resivu SEPFOPE nian ne’ebe tau iha ne’ebe? Edifissiu SEPFOPE Oekusi nian deit ha’u lahetan ona, saida tan mak atu mai foti resivu iha SEPFOPE sentral. Tanba ne’e mak hau sentre preokupa tebes tanba ema uja hau nia eleitoral hodi naok povu nia osan,” hateten Mateus.

Hafoin liu husi prosesu investigasaun ne’ebé hala’o husi Komisaun Funsaun Públiku no ikus mai suspende tiha Mario Muni husi nia kargu nu’udar diretor SEPFOPE Oe – Cusse Ambeno.

Bazeia karta sansaun administrasaun ho númeru referensia 012 SEPFOPE/GDG/I/2014 ne’ebe Timor Post asesu Kuarta (14/05) ne’ebe haruka ba diretor interinu SEPFOPE distrital Oe-Cusse esplika, bazeia ba despaisu sua exselensia Sekretariu Estadu Politika Formasaun Profisional no Empregu (SEPFOPE) ho númeru referensia 209/GSE/SEPFOPE/XII/2013 iha loron 12 Dezembru 2013 ho assuntu sansaun administrasaun diretor rejional Oe-Cusse, Mario Muni Salu. Hodi hein desijaun husi Komisaun Funsaun Públiku (KFP) kona ba klasifikasaun sansaun disiplina nian nomos desijaun politika ba kargu diretor distrital Oe-Cusse-SEPFOPE foun, nune’e diresaun nasional SEPFOPE nomeia Tarcisio da Costa hanesan diretor interinu distrital Oe-Cusse, atu bele organiza provisoriumente nesesidades administrasaun nian. Karta ne’e asina husi diretor jeral SEPFOPE, Jacinto Barros Gusmão ne’ebe hasai iha loron 20 Janeiru 2013.

Osan sira ne’e eis diretor SEPFOPE Oe – Cusse Ambeno, Mario Muni Salu mak foti no devolve tiha ona. Mario Muni Salu mós kumpri ona pensa suspensaun husi Komisaun Funsaun Públiku durante tinan ida nia laran.

Ohin lorokraik Mateus Abi sei hato’o nia deklarasaun iha Tribunal Dili kona – ba kazu ne’e rasik. (Oki)

A version of this article appears in print on April 11, 2017, on page 1 of the Timor Post edition with the headline: Ohin Tribunal Dili Julga Kazu Osan Lakon Iha SEPFOPE.