Tribunal Kondena Abilio Lima Tinan 3 Tama Prijaun

 

Eis Sekretáriu Meiu Ambiente, Abilio Lima tama prijaun tinan 3

DILI — Tribunal Rekursu hasai ona desijaun final hodi kondena eis sekretariu Estadu ba assuntu meiu ambiente Abilio Lima tinan tolu tama prijaun ba kazu abuzu poder.

Polísia Nasionál  Timor Leste (PNTL), munisípiu  Dili kumpri mandadu hosi Tribunál hodi kaptura Abilio Lima, iha nia rezidénsia Elemloi, Ai-Mutin, hodi lori ba prizaun Bekora, no parte prijaun simu Lima ho isin di’ak iha horas tuku 9 dadersan.

Diretor prijaun Bekora, João Domingos hatete, nia simu ona Abilio Lima iha loron Segunda, 15 Janeiru horas tuku 9 dadersan ho saude di’ak.

“Bazeia ba mandadu kondenasaun ne’ebe iha nia tama prijaun tinan 3 ba kazu abuzu poder”, hatete João Domingos.  

Polisia ba ka’er Lima, tanba mandadu hosi Tribunal Rekursu kona – ba kazu abuzu poder ne’ebe nia komete bainhira assume hela kargu Sekretariu Estadu ba Meiu Ambiente iha IV governu konstitusionál. 

Segundu komandante PNTL, Munisípiu  Dili, Superintendente Assistente Euclides Belo katak kapturasaun ne’ebé polísia halo tanba kumpri mandadu Tribunál nian, maibé  kona-ba arguidu tama prizaun to’o tinan hira ne’e parte tribunál mak bele fó sai ba públiku.

Timor Post edisaun Tersa, 16 Janeiru 2018. 

“Kapturasaun ne’ebé  mak ami halo ba arguidu Abilio Lima ne’e bazeia ba mandadu ne’ebé  mai hosi tribunál no ami PNTL nia knaar mak ezekuta de’it”, hatete Euclides. 

Euclides hatutan, PNTL kumpri hotu ona mandadu hodi lori kondenadu ba entrega iha prizaun tuir desizaun ne’ebé  mak tribunál foti, depois mak seksaun investigasaun kriminal  kanaliza informasaun kona-ba kondenadu ne’e.

Desijaun primeira instansia ba kazu ne’e akontese iha loron Kuarta, 30 Outubru 2013 hodi kondena Lima tama prijaun tinan lima no selu indemnizasaun sivil ba Estadu ho montante US $ 5,300.00 no kustu Judisial US $ 50,00. Iha tempu ne’eba, Tribunal mos kondena arguidu Antonio de carvalho, eis Xefi Gabinete SEMA ho pena prizaun tinan 3 fulan 6, no selu indeminizasaun sivil US $ 5,300.00 ho kustu Judisial U$ 20,00.

Hafoin desijaun ne’e, Lima halo rekursu ba Tribunal Rekursu, no desijaun rekursu nian foin fo sai iha loron 20 Novembru 2017. Desijaun ba kazu ne’e bazeia ba juis koletivu, no prosesu NUC. 2778/PDD/2011 hodi kondena Lima tama prijaun tinan 30.

Notisia versaun ne'e públika iha Jornal Timor Post edisaun Tersa, 16 Janeiru 2018 iha pájina primeiru ho titlu: Polisia Kaptura Eis Sekretariu Estadu Abilio Lima. 

A version of this article appears in print on Tuesday, 16 January 2018, on page 1 of the Timor Post edition with the headline: Police Arrest Former Secretary Estate Abilio Lima. 

  

Alkatiri Rejeita Empreza Portugal Tahan Hela Ro HAKSOLOK

 Seremónia lansamentu ró HAKSOLOK iha Portugal. Foto Facebook Don Carlos Filipe Ximenes Belo, SDB.

DILI – Eis Prezidente Rejiaun Autonomia Espesial Oe – Kusi Ambeno (RAEOA) no Zona Espesial ba Ekonómia Sosial no Merkadu (ZEESM) atual Primeiru Ministru, Mari Alkatiri rejeita empreza ka subkontrator Portuguesa tahan hela ro HAKSOLOK iha Portugal, tanba seidauk selu hotu.

Tuir reportazen Jornal ida iha Coimbra, Portugal ho naran Diário As Beiras katak ró ne’ebé halo hosi empreza Atlanticeagle seidauk bele mai Timor – Leste, tanba subkontrator ida ne’ebé fornese estaleiras (services to the shipyards), maibé fonte ida hosi administrasaun empreza ne’ebé konstroi ro ne’e fó serteza katak, oinsá mós arrestadu (tahan) ne’e seidauk halo.

“Se de’it mak tiru ka’er (tahan)  ne’e mós deve hela ita”, esplika fonte hanesan.

Maske nune’e, situasaun ne’e la impede kontinuasaun prosesu konstrusaun ró, maibé klaru katak ro ne’e sei labele sai hosi estaleiras (fatin halo/hadia ró) bainhira seidauk selu hotu tusan sira balun.  

Diário As Beiras hatutan, ne’e nu’udar kazu ida ne’ebé ultrapassa relasaun komersial entre ró nain ho ida ne’ebé halo ró ne’e (konstrutor), hanoin katak primeiru ne’e tanba governu amigo ho Portugal. Liutan ida ne’e, konstrusaun ró ne’e atrazu kuaje tinan ida ona, maibé tenke deskonta (hamenus) alterasaun sira ba projetu.

Fonte hosi administrasaun empreza Atlanticeagle Shipbuilding fiar katak, atu oinsá mós, assuntu ne’e sei ultrapassa iha tempu badak, projeksaun ba fulan ne’en (6) hodi entrega ba embarkasaun.   

“Ami hakarak termina ró, no governu Timor – Leste mós hakarak konstrusaun ba ró persija kompleta lalais”.

  

 Entretantu, eis Prezidente Rejiaun Autonomia Espesial Oe – Kusi Ambeno (RAEOA) no Zona Espesial ba Ekonómia Sosial no Merkadu (ZEESM) atual Primeiru Ministru, Mari Alkatiri rejeita empreza ka subkontrator Portuguesa tahan hela ro HAKSOLOK iha Portugal.

“Informasaun sala. Governu Timor – Leste la deve ema ida iha asunto ida ne'e. Asaun iha Tribunal la kontra Governu Timor – Leste maibé kontra AtlantickEagle, emoresa ne’ebé fabrika ró,” hatete Alkatiri ba Timor Post, Kuarta (10/01).

Alkatiri mós lakonsege fó justifikasaun kona – ba tanba saida mak ró HAKSOLOK seidauk to’o mai Timor – Leste, maibé tuir reportazen Jornal Diário As Beiras katak konstrusaun ba ró ne’e seidauk remata, no sei persija tan fulan 6 mak foin bele remata.  

Antes ne’e, Mari Alkatiri hamutuk ho Inacio Moreira, delegasaun embaixador Timor – Leste ba Portugal, ekipa delegasaun tekniku no funsionariu RAEOA, no Don Carlos Filipe Ximenes Belo halo ona lansamentu ba ro – ferry HAKSOLOK iha loron 26 fulan Maio tinan 2017 iha estaleiros iha Figueira da Foz, Portugal.

Antes atu halao lansamentu ba Ro-Haksolok ne’e, Amo Bispo Dom Carlos Ximenes Belo fo uluk bens aba Ro-Haksolok, no sai hanesan Inan Sarani (Madrinha) ba Ro Haksolok maka Madre Guilhermina Marcal husi Canossa Timor-Leste.

Tuir projeksaun tempu katak, tuir loloos Ferry Haksolok ne’e tenke remata iha tinan 2017 no tenke halo viajen mai Dili – Timor – Leste hodi inagura, maibé infelizmente to’o dadauk ne’e seidauk mosu mai hela de’it ho rajaun la klaru.

Ferry HAKSOLOK nia medida naruk mak metru 71, 30, no kapasidade tula pasajeiru hamutuk ema nain 377 no ho kareta 25. Rute viajen mak Oe – Kusi – Dili, Dili – Atauro no Atauro – Oe – Kusi.

Hafoin lansamentu, Don Carlos Filipe Ximenes Belo, SDB katak ró – áhi HAKSOLOK nia folin mak ne’e Euro millaun13,7.

“Osan barak maibé, Timor-Leste bele hetan ró di’ak ida atu serbi Timoroan sira. Ita hein katak, loron ida, Governu Timor mós bele loke fatin halo ró nian, naran “Estaleiro”, atu hadi’a ró sira no fó serbiu ba ita nia ema foin sa’e sira, mane no feto”, hatete Don Carlos. (oki)  

Notisia versaun ne'e públika iha Jornal Timor Post edisaun Kinta, 11 Janeiru 2018 iha pájina primeiru ho titlu: Alkatiri Rejeita Empreza Portugal Tahan Ró HAKSOLOK 

A version of this article appears in print on Thursday, 11th of January 2017, on page 1 of the Timor Post edition with the headline: Alkatiri Reject  Portuguese company arrest Ferry HAKSOLOK?