Tribunal Dili Adia Julgamentu Kazu RTTL, E.P

 DILI — Tribunal Distrital Dili (TDD) adia kazu Radio Televizaun Timor – Leste, Empreza Públiku (RTTL,E.P) tanba arguidu Filomino De Brito no Eduardo Ejino Silva la marka prezensa.

Ministériu públiku notifika arguidu nain hitu kompostu husi Denhis Vinardo, Evaristo Alves, Eduardo Ejino Silva, Arlindo Andra Soares, Aida De Jesus Soares, Filomino De Brito no Milena Alexandre Abrantes ne’ebé deskonfia involve iha krime “partisipasaun ekonómika no administrasaun danoza”, tanba utiliza sala orsamentu estadu hamutuk US$34000 resin ne’ebé aloka ba iha Diresaun Tekniku Apiou nian, hodi kompra (sosa) ekipamentus no halo manutensaun ba transmitter sira iha rai laran.

Iha sala audensia, juíz president, Sribuana Da Costa desidi adia tiha kazu ne’e ho razaun rua, premeriu persija halo fali separasaun tanba arguidu Filomeno De Brito ne’ebé involve iha kazu ne’e mate tiha ona no arguidu Eduardo Ejino Silva to’o oras ne’e sei moras hela. Tanba tuir kodigu penal, juís sira labele julga kazu ida bainhira arguidu sira la kompletu.

Ho razaun hirak ne’e, juíz prezidente adia fali kazu ne’e ba loron 22 Novembru 2017 horas tuku 8 dadersan.

Kazu ne’e prejide husi juís kolektiva ne’ebé kompostu husi juis presidente Sribuana Da Costa, Julmira Auxiliadora, Antonino Gonçalves, no ministériu públiku repezenta husi prokuradora Angelina Saldanha no arguidu sira hetan asisténsia legaál husi advogadu José Pedro Camões, inklui advogadu privadu nain rua husi Portugal. 

Timor Post edisaun, Kinta 13 Jullu 2017

Antes ne’e, João Galucho de A. Ximenes nu’udar xefe departementu lojistik RTTL, E.P katak, loos duni iha tinan 2014 governu aprova duni osan hamutuk U$ 34000 resin ne’ebé aloka ba iha Diresaun Tekniku Apiou nian hodi kompra (sosa) ekipamentus no halo manutensaun ba transmitter sira iha rai laran. Maibé, ekipamentu sira ne’e to’o ohin loron seidauk tama, tanba nia tempu atu loke tenderizasaun ne’e atraza itoan nomos debate orsamentu ba RTTL E.p ne’e atrza itoan mak hodi kontribui ba situasaun atraza ne’e.

“Iha tempu ne’eba, ita iha ona kontratu ida ho kompañia Formo Unipessoal Lda mak hetan tender ida ne’e. Husi Diresaun Tekniku Apiou mak la fó proposta ka sira nia persije ne’ebé mak sira persija atu sosa ne’e ba iha kompañia hodi bele sosa ona sasan sira ne’e. Pagamentu ba kompañia ne’e remata tiha ona, maibé to’o ohin loron sasan ida mak seidauk tama mai iha ne’e,” hatete João Galucho de A. Ximenes ba Timor Post iha nia serbisu fatin RTTL E.p, Caicoli-Dili, Sesta (07/08/2015).

“Kompañia hein hela lista sasan husi parte tekniku nian atu bele sosa ona. Foin lalais ami hasoru malu ho kompañia mai iha ne’e no deklara katak hein hela lista sasan husi parte tekniku hodi bele sosa ona,” nia hatete.

Nia hatutan, maske mosu atrazu itoan kona-ba prosesu ne’e rasik, maibé entre kompañia ho parte tekniku konkorda malu ona hodi hatama sasan sira ne’e mai iha tempu badak hodi bele halo manutensaun ba transmitter sira iha Munisipiu 13.

Xefe departementu ne’e mós ladun iha koñesementu klean ba rajaun selu tiha ona osan 100% kompañia, maibé to’o oras ne’e sasan ida seidauk tama ba RTTP E.p.

“Problema ida ne’e akontese ona iha tinan 2014 no ha’u foin simu posse iha loron 25 Maio 2014, ne’ebé ha’u ladun komprende klean, maibé realidade hatudu ekipamentu sira ne’e seidauk tama mai to’o’o ohin loron maske pagamentu ba kompañia hotu tiha ona,” nia esplika.

  Timor Post edisaun, Kinta 13 Jullu 2017

Entretantu, Diretur Diresaun Nasionál Apoiu Tekniku, Josefino Babo rejeita atu fó klarifikasaun, tanba kestaun ne’e nu’udar kestaun interna ne’ebé la merese no la persija fó sai ba liur maske osan hamutuk U$ 34000 ne’e nu’udar povu nia osan ne’ebé aprova ba RTTL E.p hodi  hadiak liutan sira nia serbisu atu bele hakonu povu nia direitu ba informasaun iha rai laran. 

 

   Prezidente Board RTTL, E.P, Milena Soares Abrantes

Prezidente Konsellu Administrasaun RTTL, E.p, Milena Soares Abrantes esplika liu husi Nota Imprensa ho númeru referênsia 131/PRESIDENTE CA-RTTL, EP/VIII/2015 ne’ebé dirije ba redasaun Timor Post iha loron Kinta, 13 Agustu 2015 katak Konsellu Administrasaun RTTL, E.p liu husi meius ida ne’e informa katak notisia ne’ebé resentamente mosu iha públiku, ne’ebé depois hetan koñesimentu diskonformidade relative ho kontratu fornesimentu no Manutensaun ba ekipamentus RTTL, E.p nian, ho Empreza Formo Unipessoal Lda. RTTL, E.p, haruka instaura imediatamente inkeritu hodi apura se faktu sira ne’e verdadeiru.

Konklui ba referida investigasaun, Konsellu Administrasaun RTTL, E.p apura katak referida kontratu empreza Formo Unipessoal, Lda seidauk kumpri totalmente komprimentu, tanba ne’e RTTL, E.p bolu empreza Formo Unipessoal, Lda. Hodi prosede ninia komprimentu integral ho prazu maximu loron tolu nolu (30).

“Ho modo ne’ebé hanesan empreza Formo Unipessoal, Lda rekoñese. Bainhira emrpeza la kumprii integralmente ba referidu kontratu, mak RTTL, E.p sei halo asaun imediatu tuir meius legais,” Prezidente Konsellu Administrasaun RTTL, E.p, Milena Soares Abrantes esplika liu husi Nota Imprensa ho númeru referênsia 131/PRESIDENTE CA-RTTL, EP/VIII/2015 ne’ebé dirije ba redasaun Timor Post iha loron Kinta, 13 Agustu 2015.

Maibé antes ne’e iha loron Sesta, 7 Agustu 2015 Milena Abrantes katak to’o oras ne’e nia lahatene ida no nia seidauk iha faktus kona-ba prosesu pagamentu 100% ba kompañia Formo Unipessoal Lda.

“Ita rona husi ne’ebé? Ha’u seidauk bele hetan faktus, ha’u seidauk bele koalia. Ha’u seidauk bele koalia, tanba faktus iha ha’u koalia, laiha faktus, ha’u mós lakoalia ida,” hatete Milena Abrantes ho lian siak no oin mean tebes ba Timor Post iha edifisiu RTTL E.p, Caicoli-Dili, Sesta (07/08/2015).

Entretantu, kompañia Hard Rock rekoñese ona prosesu pagamentu ba tender fornese ekipamentu tekniku ba Radio no Televizaun Timor-Leste, Empreza Públiku (RTTL-E.p) remata tiha ona iha tinan 2014, maibé rajaun to’o oras ne’e seidauk hatama ekipamentu hirak ne’e, tanba Italia oras ne’e afeta hela krize finanseiru mundial.

Diretur Kompañia Hard Rock, Denys hatete, tenderizasaun ne’e Kompañia Formo Unipessoal mak manan no natureza prosesu tenderizasaun ne’e mós Emerjensia, entaun xefe bo’ot sira iha RTTL-E.p ne’eba bolu de’it Formo Unipessoal Lda mak tama iha tenderizasaun ne’e.

“Waktu itu kan emerjensi, kalau tidak takutnya uang mereka hilang karena mereka sudah mau mendekati penutupan buku annual. Jadi kita yang tangung jawab untuk memasukan alat-alat itu, tetapi, sementara belum masuk karena Italia lagi kena krisis keuangan. Kalau kita pesan dari Indonesia itu gampang dan cepat, tetapi alat ini kita pesan dari Italia yang sampai hari ini juga mereka belum produksi,” hatete Diretur Kompañia Hard Rock, Denys ba Timor Post iha nia serbisu fatin Colmera-Dili, Segunda (31/08/2015).

“Peralatan ini tinggal didatangkan aja, tetapi sekarang kita masih meeting sama RTTL-E.p lagi karena tidak tahu mereka ada perubahan misalnya kadang-kadang ada barang lai yang rusak kita akan gantikan, begitu,” esplika Denys ho nia pozisaun parte liman loos kaer hela osan lobuk ida hodi fó ba Jornalista Timor Post, maibé Jornalista ne’e rejeita hodi simu osan hirak ne’e maske Denys tenta dala tolu kedas hodi fó osan sira ne’e ba Jornalista.

Denys mós konsiente, prosesu hatama ekipamentu hirak ne’e ba RTTL-E.p kleur demais, tanba nia hamenon husi Italia, la’os husi Indonézia.

“Karena mereka ada krisis di Eropa sehingga belum bisa produksi alat-alat ini juga,” esplika Denys.

Nia hatutan, durante tinan barak ona Hard Rock serbisu hamutuk ho kompañia Formo Unipessoal Lda ne’ebé mak sempre manan projetu sira iha RTTL-E.p. Projetu tenderizasaun iha RTTL-E.p kuaje durante tinan 10 resin sempre manan husi kompañia Formo Unipessoal Lda.

Ho situasaun nune’e, osan hamutuk U$ 34000 ne’ebé aprova ba RTTL-E.p ameasa atu mout tiha, tanba osan sira ne’e selu hotu ona ba kompañia Formo Unipessoal Lda iha tinan 2014 hodi sosa ekipamentu hadia transmitter sira iha Munisipiu 13, maibé realidade hatudu to’o’o oras ne’e seidauk iha ekipamentu ida mak ba tama iha parte lojistik nian. (ven/oki)

A version of this article appears in print on July 13th, 2017, on page 1 of the Timor Post edition with the headline: TDD Adia Julgamentu ba Kazu Deskonsia Korrupsaun iha RTTL, E.P 

Notisia Timor Post edisaun Kinta, 13 Jullu 2017 iha pajina primeiru ho titlu: TDD Adia Julgamentu ba Kazu Deskonsia Korrupsaun iha RTTL, E.P.

Adjuntu KAK Rekoñese Hetan Alegasaun

 Adjuntu Komisariu Komisaun Anti – Korupsaun (KAK) ba prevensaun no sensibilizasaun, arguidu Rui Pereira dos Santos

DILI – Adjuntu Komisariu Komisaun Anti – Korupsaun (KAK) ba prevensaun no sensibilizasaun, arguidu Rui Pereira dos Santos rekoñese hetan duni alegasaun husi Ministériu Públiku kona – ba projetu suku farda ba funsionariu Provedor ba Direitu Humanu no Justisa (PDHJ) iha tinan 2014, maibé seidauk bele rezigna a’an husi kargu atual, tanba seidauk hetan pedidu nia superior rasik.

Antes ne’e notisia Timor Post nian iha edisaun Sesta, 7 Jullu 2015 ho titlu deskonfia

“Loos duni, notifikasaun kona – ba alegasaun katak iha PDHJ kona – ba . . . la’os sosa farda, maibé suku farda. Loos duni adjuntu KAK mak provedor interinu iha momentu ne’eba,” hatete adjuntu KAK, arguidu Rui Pereira dos Santos liu husi konferensia imprensa iha edifisiu KAK, Farol Dili, Segunda (10/07).  

Nia hatutan, prosesu suku farda ne’e mos liu husi prosesu aprovizionamentu normal.

“Ha’u hanoin husi parte KAK nian mos notifika ona staff PDHJ lubuk ida mak mai presta informasaun no ha’u rasik nu’udar adjuntu KAK labele presta deklarasaun iha KAK, tanba konflitu interese iha ne’e,” nia esplika.

“Entaun Ministeriu Publiku mak sei notifika ha’u. Ha’u adjuntu KAK hetan ona notifikasaun dala ida husi Ministeriu Publiku, maibe seidauk ba,” nia esplika.

“To’o agora ne’e ha’u bantah total ha’u seidauk na’ok osan Estadu ida,” nia hatete.

Entretantu, tuir karta notifikasaun adjuntu KAK Rui Pereira dos Santos ba Ministeriu Publiku oficio No. 05/VI/2017 iha loron 16 Juñu 2017 ne’ebe dirije ba Prokuradora Lidia Soares ho assuntu husu adia loron ba inkeritu prosesu no:NUC0106/2016/2016/PGGCC, tanba iha loron ne’e arguidu Rui Pereira dos Santos atu ba tuir enkontru implementation review group UNCAC nian iha Viena, Austria. Hafoin remata enkontru ne’e, arguidu Rui foin to’o iha Dili, Timor Leste iha loron 7 Jullu 2017.

Nia hatutan, kona – ba kazu ne’e funsionariu husi PDHJ hanesan iha diretor jeral balun, direitor finansas no parte aprovizionamentu PDHJ nian sei ba hatan hotu iha Tribunal.

Bazeia ba nia profile katak, arguidu Rui nu’udar advogadu durante tinan lima iha tempu okupasaun Indonezia, tempu ukun a’an desde tinan 2000 to’o tinan 2005 nu’udar juiz iha Tribunal Dili. Iha tinan 2005 nu’udar komisariu ba Komisaun Verdade no Amizade (KVA) entre Timor Leste ho Indonezia. Iha tinan 2010 to’o 2014, arguidu Rui asume kargu nu’udar adjuntu provedor ba area governasaun di’ak.

“Desde serbisu nu’udar juiz no oras ne’e nu’udar adjuntu KAK ne’e seidauk na’ok Estadu nia osan vintez ida ka quarter ida sa tan to’o ribuan ka jutaan dollar, seidauk. Ha’u bele gava a’an ne’e Mr Clean,” nia esplika.

“Alegasaun hasoru ha’u nu’udar eis adjuntu provedor, la’os ha’u mesak de’it maibe iha mos kargu xefia balun iha PDHJ nian kona – ba assuntu suku farda,” nia esplika.

Arguidu Rui mos lamenta tebes ba investigador KAK sira ne’ebe lekar no fakar sai informasaun ne’e ba iha publiku liu husi kanal media imprime Timor Post, tanba investigador KAK ne’e viola ona nia serbisu.

“Buat ne’ebe sei iha faze investigasaun ne’e tuir loloos labele fo sai ba iha media no ba oin ami sei la autoriza kualker funsionariu ida iha KAK ninian atu fo informasaun ba media,” nia esplika.

Prosesu alegasaun kontra adjuntu KAK ne’e mak NUC 0106/16.PGGCC ne’ebé Rui Pereira dos Santos nu’udar arguidu no arguidu rasik hatete ona katak nia prontu atu koopera ho justisa.

“Ami sei ba to’o iha Tribunal depois juiz mak desidi loos ka sala,” hatete Arguidu Rui.

Nia hatutan, bainhira Komisariu KAK, Aderito Tilman Pinto husu nia atu rezigna a’an mak nia foin halo.

Entretantu, bazeia ba komunikadu imprensa ofisial husi KAK nian konsidera notisia sira ne’ebe publika iha Timor Post edisaun Sesta, 07 Jullu 2017 ho titlu “Deskonfia Ema Importante Ida Iha KAK Komete Korupsaun” no edisaun Sabadu, 8 Jullu 2017 ho titlu, Investiga “Laho” Deskonfia Sikat Subar Iha KAK sei la afeta negativamente ba integridade no naran morin KAK iha luta kontra korupsaun iha rai doben Timor Leste.

“KAK sei iha moral di’ak atu serbisu hamutuk ho povu doben rai ida ne’e nian, serbisu hamutuk ho entidade tomak; instituisaun publiku, instituisaun privadu, konfisões relijioza, media, ONG no sira seluk tan iha luta global kontra korupsaun,” hatete Komisariu Interinu, Manuel Bucar.

Bucar hatutan, konferensia imprensa ne’ebe hala’o husi adjuntu komisariu ba assutu prevensaun no sensibilizasaun, Rui Pereira dos Santos iha edifisiu KAK hanesan assuntu individual, tanba kazu ne’ebe publika Jornal Timor Post nian akontese iha instituisaun seluk.

Timor Post edisaun Tersa, 11 Jullu 2017

Iha loron Kuarta, 05 Juñu 2017, horas tuku tolu lorokraik, Timor Post hakat ba edifisiu PDHJ nian hodi halo intervista ida ho Provedor Silverio Pinto Batista, maibé lakohi komenta ho rajaun kazu ne’e agora iha ona Ministériu Públiku nia liman.

Komisariu KAK, Aderito Pinto rekoñese ona katak kazu ne’e KAK mak investiga uluk depois haruka ba MP. No iha loron

Kuarta, 5 Jullu liuba, MP haruka tan notifikasaun foun ba KAK hodi haklean tan sira nia prosesu investigasaun.

“Kazu ne KAK mak investiga no finaliza ona haruka ba MP. Mezmu nune tenki respeita principio prezunsaun da inocencia,” hatete Komisariu KAK Aderito via chatting Facebook ba Timor Post, Kinta (06/07).

Iha parte seluk, bazeia ba informasaun ne’ebe Timor Post rekoella katak uniforme ba funsionáriu Provedoria ba Direitu Humanu no Justisa (PDHJ) ne’ebé fornese iha tinan 2014 oras ne’e la uza  no rai hela iha armajen PDHJ nian, tanba deskonfia mosu problema nomós laiha kualidade.  

Funsionáriu ida iha PDHJ nian rekoñese katak, uniforme sira ne’ebé fornese desde tinan 2014, oras ne’e rai metin hela iha armajen PDHJ nian.

“Desde tempu ne’eba, to’o agora ami la uza  ida, tanba uniforme sira ne’e dehan laiha kualidade no mosu kazu,” haktuir funsionáriu  lojistik PDHJ nian ne’ebé mós tauk atu fó sai nia identidade kompletu ba públiku.

Entretantu, eis Provedor ba Direitu Humanu no Justisa (PDHJ), Sebastião Dias Ximenes, mós rejeita atu fó komentáriu kona – ba kazu ne’e, tanba kazu ne’e agora iha ona Ministériu Públiku nia liman. (oki) 

A version of this article appears in print on July 11th, 2017, on page 1 of the Timor Post edition with the headline: " Ha'u Seidauk Na'ok Osan Estadu"

Notisia Timor Post edisaun Tersa, 11 Jullu 2017 iha pajina primeiru ho titlu: "Ha'u Seidauk Na'ok Osan Estadu".